ВЕРСИЯ ДЛЯ СЛАБОВИДЯЩИХ

 


Главная > На дигорском > Сæйгити зæрдитæмæ рохс уадзуй

Сæйгити зæрдитæмæ рохс уадзуй

Дохтир исунмæ æрдзæй рахæсгæ курдиадæ гъæуй. Фиццагидæр гъæуама уа адæмуарзон, цифæнди кари адæймагмæ дæр æвдеса рæсугъд зæрди уагæ. Æ зонундзийнæдтæй, æ фæлмæн къохти бавнæлдæй дæр сæйгæн дæтта æууæнкæдзийнадæ цардмæ. Зæрондæй, сувæллонæй медицинон æнхус ке нæ багъæуй, уæхæн нæййес. Дохтири бæрнон куст адæймаг уæд балæдæруй æма æй мæлæти дзæмбутæй ку ратонуй, æ  рист, æ гъæзæмарæй æй ку фæййервæзун кæнуй. Цæмæй медицинон косæги дæсниадæ равзарай, адæмæн кæдзосзæрдæй лæггадæ кæнай, ауодай син æ ʹнæнездзийнадæбæл, уомæн гъæуй æнæкæрон уарзондзийнадæ æма тухгин зæрди хецау ун.

«Рохс кæнун иннетæн, мæхуæдæг содзун», — загъта берæ æнзти размæ голландиаг дохтир Ван Тюльп. Уæдæй нурмæ берæ æнзтæ рацудæй, фал нæ уорсхалатгинтæй аци загъд беретæн сæ зæрдити арф  бунат искодта æма сæ дохтири зонундзийнæдтæй æнцæ адæмæн рохс лæваргæнгутæ, сæ ервæзунгæнгутæ. Уонæй сæ еу æй Хъожити Ларисæ, Лескени гъæуи амбулаторий медицинон хуæрæ. Берæ æнæхуссæг æхсæвтæ рарветуй тухст сæйги фарсмæ, берæ хæттити ибæл æрбабон уй, дорзæрдæ мæлæти хæццæ тох кæнгæй. Æ фæлмæн цъухи дзурд сæйгæн фæууй æвдадзи хуасæ. Есге рист хæстæг есуй æ зæрдæмæ. Гъæуи цæргутæн æй изæди хузæн. Цал æма цал сæйги рацæуй æ къохтæбæл, цал зини æма ристи райсуй æхæмæ, цал сагъæсæй идзаг бони æма æнæхуссæг æхсæви рарветуй астдзæгъдгæ незæй сæйгæмæ кæсгæй? Æнхæст æй адæймаги егур хуарз менеугутæй. Æй адæмуарзон, фæлмæнзæрдæ, есге зин зæрдæмæ хæстæг есагæ.

Дзæуæгигъæуи медицинон училище каст ку фæцæй, еци бонæй фæстæмæ æ размæ ивæрд нисан æнхæст кæнуй зæрдиуагæй. Анзæй-анзмæ арфдæр кæнуй æ зонундзийнæдтæ. Ларисæ æрмæст хуарз медицинон хуæрæ нæй, фал ма куд адæймаг, куд силгоймаг, уотæ дæр æй фæнзуйнаг, лæгигъæдгун, рæсугъд уоди хецау. Мах, Бадзити бийнонтæ, хæстæгутæ, ан æнæкæрон боз аци силгоймагæй. Нæ фæлмæн мадæ, хуæрæ, бийнойнаг Розæ фæссæйгæ æй æнамонд незæй. Гъулæггагæн, еци нези нихмæ хуасæ ирд нæма æрцудæй. Ресгæ уодæй æгудзæг дæр ма ци фæууй? Гъудæй æй дохтири æнхус, уæлдайдæр ба — медицинон хуæри. Ларисæ, цума нæхе бийнойнаг, уæхæн цæстæй ракастæй Розæмæ. Нæдæр æ рæстæгбæл, нæдæр æ уоди хъаурæбæл ауæрдгæй, еудадзугдæр архайдта, цæмæй тухст сæйгæн фенцондæр кодтайдæ æ катай. Æрмæст æ фæлмæн цæстингас æма зæрдæвæрæн дзубандитæй дæр нифс уагъта Рози зæрди. Цифæнди афони имæ фæдздзорæ, æваст æрбалæууидæ нæ фарсмæ.

Адзалæн мадзал нæййес, ци загъдæуа æнæхатир хъисмæтæн. Нецибал ин исагъазæй нæ уарзон адæймагæн. Бацудæй еʹносон дуйнемæ Розæ. Фал мах, Бадзити бийнонтæ, æнæкæрон арфæ кæнæн зæрдиуагæй Хъожити Ларисæн. Хуцауи фарнæй хайгин адæймаг дæ, ма дин æрмæст бийнонтæ нæ, фал æгас Бадзити муггаг дæр арфæ кæнуй. Цæрæ, нæ хъазар Ларисæ, берæ æнзти, деʹнæнездзийнадæ федар уогæй. Цард бацæрун æма адæмти фарнæ бакосун хъæбæр зин æй, æма дæ хъаурæ фулдæр кæнæд. Уо зæрдрохс, амондгун, дæ бийнонти æхсæн дæр æма, кадгин ци муггаги астæу дæ, уони æхсæн. Æнафони зиндзийнадæй дæ гъæуай дарæд Хуцау. Сæйгитæн ба лæггадæ кæнæ абони хузæн, сæ зæрдитæмæ син рохс уадзæ.

Бадзити бийнонтæ, Лескени гъæу.

Комментирование закрыто.